Acts 4

Pitö Jon yetkön jike kaunsöl kambunöŋ kinohot.

1Pitö Jon yetkön ambazip kambu yeŋgöra keu mewö jiyohotka jike nup galöm yeŋön, jikegö kiripo galöm bohonŋan aka Sadyusi (Jike nupkö kapaŋkölköl) yeŋön wahöta jeŋire kaŋgotket. 2Gwarekyahötŋan ambazip kambu kusum eŋgiba kewö jiyohot, “Jisösnöŋ kömupnöhök wahörök. Miaŋgö dop kömugeri, yeŋön mewöŋanök guliba wahötme.” Mewö jiyohotka uruŋini böliiga yetköreŋ kaŋgotket. 3Kaŋgota etkömemba miri söŋauyöhaŋgöra aka kösö mire al etkiba jiget, “Miri giaŋiigun keu jakeŋe al etkibin.”

4Mewö jigetmö, Buŋa keuŋiri mötkeri, yeŋgöreŋök jesöŋgöŋan uruŋini meleŋda Jisös möt nariget. Möt narigeri, yeŋgö jaŋgöŋinan qariiga 5000:gö dop aka malget.

5Miri giaŋiiga galömkölköl aziurupŋini, Juda yeŋgö jitŋe memeurupŋini aka Köna keugö böhi yeŋön Jerusalem tokoget. 6Tokoba jike nup galöm bohonŋi qetŋi Anas yaŋön sutŋine tarök. Mewöyök Kaiafas, Jon, Aleksander aka jike nup galöm bohonŋaŋgö saiwaurupŋi tosatŋi pakpak mi mohotŋe tatket. 7Tatketka Pitö Jon etkuaŋgita jeŋine al etkiget kinohotka kewö qesim etkiget, “Etkön mönö denöwö ahot? Dagö qetŋi qerohotka ösumŋi etkualöŋni letorök?”

8Qesim etkigetka Uŋa Töröŋan Pitögö uruŋi kokolak qei kinda kewö jii mötket, “Kantrigö galömkölköl azi aka jitŋememeurupnini, mötket! 9Niri lokon azi denöwö alabauk ak waŋgiziga könaŋi guliba ölöwahök, merak mewö qesim netkize. 10Miaŋgöra miaŋgö likepŋi mi ölöp jibiga iŋini aka Israel ambazip könagesö pakpak mötme. Eŋön Nazaret azi Jisös, Amötqeqe Tonini maripomnöŋ qegetmö, Anutunöŋ i mem gulii kömupnöhök wahörök. Jisös qetŋaŋgö ösumŋan mönö azi ki möhamgöiga eŋgö jeŋine ölöwaka kinja. 11Keu kun kewö,

‘Miri meme azinöŋ köt tandö kun andö qeba mosötketmö,
Anutunöŋ mi aliga ain tandö kömbönaŋi bohonŋi akza.’
Ain tandö bohonŋi mi Jisös.

12“Jisös mohotnöŋ mönö amöt qem neŋgiza. Qet kun köuluköinga mi osimemö, Jisösgö qetŋan mönö dop kölja. Anutunöŋ qet kun Suepkö bapŋe qahö neŋgiiga ahöza. Qahö! Qet mohot mi qeta letota Suepkö buŋaya akin.”

13Mewö jim teköiga tandökŋiri eka kewö jiget, “Azi yahöt kietkön mötmöt mire qahö öŋgöba töndup keu köhöikŋi köhöikŋi jiba awösamkakak kinda suahö ewö akzahot.” Mewö jiba köŋkuŋ aka welipköba könaŋiri möt kutuba jiget, “Alakŋa! Azi yahöt mietkön mönö Jisösbuk mala letorohot.” 14Könaŋiri möt kutuba jiba lokon azinöŋ ölöwaka yetpuk kinöhi, mi eka keuŋiri qeapköbingö osiget. 15Mi osiba jike kaunsöl kambu eŋgömosöta yaigep gemahotkö jim kutuget geyohotka nanŋinök keu jaruba goro aket.

16Goro aka jiget, “Nini azi yahöt ki mönö denöwö ak etkibinto? Yetkön jim kutuyohotka aŋgöletot qainŋi kun asuhuyöhi, mi Jerusalem körek pakpak yeŋön möt teköze aka nini mi mewöyök qaŋ kölbingö osizin. 17Mi osizinmö, miaŋgö keuŋi ambazip sutŋine kunbuk sehiba anbapuköra mönö ölöp kewö jim kutum etkiinga dop kölma, ‘Iŋiri mönö Jisösgö qetnöŋ keu kunbuk kude jimahot.’ Mewö jiba köhöikŋanök jim qetal etkiinga sörauyohotka kunŋan kun mi qahö möri teköma.”

18Mewö jim jöhöba etkoholget öŋgöyohotka kewö jim kutum etkiget, “Iŋiri mönö Jisösgö qetnöŋ keu kun kude toroqeba jiba ambazip kusum eŋgimahot.” Mewö jiba soŋgo köhöikŋi al etkiget. 19Mewö jim kutum etkigetmö, Pitö Jon yetkön meleŋda kewö jiyohot, “Netkön eŋgö jimkutukutuŋini tem kölbitköra Anutugöreŋ keu memba et aljiga omaŋi akapuk. Mi Anutugö jemesoholŋe dop kölja me qahöwi, mi mönö nanŋinak kewöta jiba jöhöme! 20Mewö me mewö jiba jöhöbeakmö, netkön yuai eka möriri, mi köyatiba keu bök malbiraŋgö dop qahö.”

21Mewö jiyohot mötketka ambazip körekŋan aŋgöletot asuhuyöhi, miaŋgöra Anutu möpöseiget. Mewö möpöseigeraŋgöra aka “Likepŋi denöwö ak etkibinak?” jiba köna kun qahö miwikŋaiget. Qahö miwikŋaiba galöm meme keu köhöiba jim etkiba etkömosötketka erohot. 22Aŋgöletot asuhuiga lokon azi ölöwahöhi, mi (yara) yambuŋi 40 lök oŋgita malök. Miaŋgöra mönö Anutu gwötpuk möpöseiba malget. Mewö. ^{a , b}

Mötnarip yeŋön köuluköba kin köhöiget.

23Jike nup galöm bohonŋi aka jitŋememe yeŋön Pitö Jon galöm meme keu jim etkiba etkömosötketka nanŋiri alaurupŋiri yeŋgöreŋ liliŋgöba anohot. Anda keu pakpak jigeri, mi jiyohotka mötket. 24Mi jiyohotka möta urumohot aka uruŋini qezaköba jölŋini memba wahöta Anutu kewö köuluköm waŋgiget, “O Kembu öŋgöŋgöŋi ketaŋi, göŋön Suep, gölme, köwet aka yuai pakpak mieŋgöreŋ ahözawi, mi miwikŋaim eŋgiba Toŋina akzan. 25Göŋön mönöwök nangi Uŋa Töröŋi melainöŋ eta nup azigi Deiwid, neŋgö ambönini yaŋgö numbuŋe keugi ali göhö jitki memba kewö jiyök,

‘Urumeleŋgö kopa yeŋön mönö wuanöŋgöra göjuŋi göjuŋi memakze?
Kantriŋi kantriŋi yeŋön mönö denöwögöra aka mötmöt omaŋi omaŋi mötmörimakze?
26Gölmegö kiŋ kembuŋi kembuŋi yeŋön gölmeŋinaŋgö dop wahörakze.
Pom jembonŋi jembonŋi yeŋön mindiriba tokomakze. Mewö qeburuŋ yöhöi Kembu aka yaŋgö Amötqeqe Toŋi qetal etkimakze.’
27Ölŋa, keu miaŋgö dop siti kiaŋgöreŋ asuhuyök. Gi Nahöngi Töröŋi Jisös kuŋgunöŋga Amötqeqe Tonina akza. Yaŋön asuhuiga azi kembu yahöt Herod aka Pontius Pailöt yetkön Rom gawman galöm aka nanine Israel isikurupnini yembuk mindiriba totoko ala tuarenjoŋ ak waŋgiget. 28Gi nangak ösumgi aka jitkahö dop yaŋgöra yuai asuhumapkö keuŋi jiba qeljiŋe jöhöba areŋgönöŋ. Yeŋön yuai mi ak waŋgigetka keu areŋ pakpak mi mewö ölŋambuk ahök.

29“O Kembu, nini gi welen qem gihiinga merak galöm meme keu neŋgizei, gi mönö mi eka naŋgöm neŋginöŋga ölöp göhö Buŋa keugi suahö ewö awösamkakak kinda jiba malbin. 30Göŋön mönö börögi surunöŋga kawöl ambazip mi Nahöngi Töröŋi Jisösgö qet ösumŋe ölöwakŋe aka aŋgöletot aiwesök murutŋi murutŋi asuhumakŋe. Keu mi ölŋa.”

31Mewö köulukögetka miri tokoba tatkeri, gölme mi memenjaliba utuköiga Uŋa Töröŋan körek pakpak uruŋini kokolak qeiga anda suahö ewö awösamkakak kinda Anutugö Buŋa keu jiba malget. Mewö. ^{c , d}

Mötnarip ambazipnöŋ uru jöhöm aŋguget.

32Urumeleŋ kambu ketaŋi yeŋön urumohot aka mötmöt mohot aka malget. Yuai pakpak ahöm eŋgiyöhi, mi göhöreŋök me nöŋgöreŋök, mewö qahö jigetmö, yuai pakpakŋini mi mutulaŋgöba mohot aiga malget. 33Mewö malgetka Anutugö ösumŋan eŋgualöŋniga köhöigetka aposol yeŋön jitŋini memba dangunu ewö kinda Kembu Jisösnöŋ kömupnöhök guliba wahöröhi, keu mi naŋgöba jiba malget. Mewö malgetka Anutunöŋ kalem möriamŋi ketaŋi mokom eŋgiiga ambazipnöŋ göda qem eŋgiget. 34Mewö malgetka miaŋgö dop sutŋine kunŋan yuai kungöra qahö mözöröŋgöba osiba malök. Körek pakpak nene nupŋi nupŋi aka miriŋi miriŋi mieŋgö toŋi akeri, yeŋön mi bohonŋi memegöra alget. Mewö algetka söŋgöröŋi moneŋ kaiga mi memba kaget. 35Memba kaba aposol yeŋgö böröŋine algetka körek pakpak mözöröŋgöba osigeraŋgö dop mi sutŋine mendeŋda eŋgiba malget.

36Azi kun qetŋi Josef, aposol yeŋön qetŋi Barnabas qetkeri, mi nanine keunöŋ: Uru naŋgönaŋgö azi, yaŋön gölme jölanŋi qetŋi Saiprus miaŋgöreŋ asuhuba qariba jike nup azia (Liwait) malök. 37Yaŋön mewöyök nene nup gölmeŋi bohonŋi memegöra ali moneŋ kaiga söŋgöröŋi mi memba aposol yeŋgöreŋ kaba böröŋine alök. Mewö. ^e